12 Янв, 2012

Урал кундемыште!!!

Урал кундем. Тыге ойлымо дене кугу курык ончылнет сӱретлатеш. Но курык коклаштыжак огыл, а Урал воктеныже шкаланже сылне вер-шӧрым ойырен марий калык  тыште илаш тӱҥалын. Кызытат ила, пашам ышта, шочшым кушта.

А мыйын гын шуко жап шонен коштмем шукталте. Миен савырнышым. Ончалын гына огыл, а концерт программе дене коштын толна. Мый, Сергей Карпов, марий элын сулло артистше Александр Егошин, самырык мурызо-влак Игорь Шубин, Свердловск кундемын ӱдыржӧ Елена Иванова шуко вере кужу теле каныш жаплаште калыкым куандараш тыршына. Тау порын вашлиймыштлан. Каласыман, Урал кундемын калыкше эше марий кумылжым, уна вашлиймыжым монден огыл. Чыла тылат ышташ ямде улыт. Тиде кумылзак кумылышт чонымак куандарыш. Но тудо жапыштак кызытсе илышын аяран косаже пеш палдырна. Колхоз-влак пытеныт, ял эркын иземеш, самырык-влак каят, чот рушаҥыт.

Мый тыште шукыжак ом ойло. Лач мыскарам дене кылдалтше иктешлымашем каласынемак. 19 вере лийынна. Теве 4 ялыште мыскарче кумылан-влак ятырынак ыльыч. Тиде  — Курки -Кӱркеде, Кугу Тӓвра, Марий Карши, Андрейково -Андрий (Андругал) ялыште. Тысе калык умша гыч лектын шушо мыскарам вик воштылыныт. Моло вереат каласыман кумылынак колыштыныт . Умылем южгунамже, а чынжым гын шукыж гана литератур йылме тораҥден. Умылен шуктен огытыл.  Но туге гынат кажне гана кидсовышышт кумылым пуен. Тыште гастроль дене коштмашын кугу амалым ыштышыже Вячеслав Петров. Тудо кугу пашам ышта. Пытартыш жапыште  еҥ-влаклан у деч у артист-влакым ончалашаш, колышташ, аклаш амалым ышта. Диск дене гына колыштын да ончен ок серлагыгте. Молодец марий!!! Тыгак умбакыжат. Шуко оҥай ен вашлиймаш лие.Чыланыштым ом каласе. Иктаж-кӧжым монденат коден кертам.

Но эн чот, чынжымак Сарсы-Сарсаде ӧрыктарыш. Тушто ече дене мунчалташ пеш сай настам келыштареныт. Подъёмникым ыштеныт. 2 январь гыч ышта. Кугу курыкыш ынде шӱлешт шӱлешт от кӱзен кий. Пжи-и-и-ик и кӱшнӧ. Вара ече дене пылыш воктечет мардеж тыгак пж-и-ик веле манын шӱшкен кодеш. Чапле вер. Тале еҥ-влак тыште илат. Пашада ушныжо веле манаш кодеш. Куанен, канен тольым. Урал марий — тале марий. Мучашлан мыскара.

Кок еҥ вашлийыт.

Мом кычалат – Кӓзям

Кузе лӱмет – Мӓрзя

Могай  ял (авыл) гыч улат – Кӓрзя.


Сергей Карпов

http://esmetr.ru/%D0%B0%D0%B2%D1%82%D0%BE%D0%B1%D0%B8%D0%BE%D0%B3%D1%80%D0%B0%D1%84%D0%B8%D0%B9/

Вам понравиться

Добавить комментарий

Ваш e-mail не будет опубликован. Обязательные поля помечены *