26 Янв, 2017

Пошкудо… Ёлкин Илья

«М» буква деч посна.

Пареҥге лукташ ялысе калыклан путырак шуко жап да вий кӱлеш. Кӱнчет, ойыркалет, телылан аралаш пыштет. Йӧра эше, пареҥге пакчатше пӧрт шеҥгелнак, а иктаж шӱдӧ важык тораште огыл гын.

Теве тыге Йыван ден Окси пелашыже шке пакчаштышт пеш тыршен кӱнчат. Пареҥге шолдыра, лектышыжат кугу.

— Калып гай кугу, — ышталыт коктынат.

Воктен пакчаште Овдачи пошкудышт шогылтеш. Шкет тудо шкетак, паша пешыжак ок вораҥ. Уке-уке, нине кок пошкудо кугу ешанак улыт, каныш кечылан погынен толыт гын, пареҥге пакчат пел кече жапыште лектын возеш.

Тыглай кечын шкет еҥжат яра ок шинче, рушарня йотке пакчаштак эртара. Теве вашке кӱтӱ пура, тидын деч ончыч пакча гыч пареҥге кораҥдалтшаш. Йыванын кидыште тиде паша пеш вашке ышталте. Окси пошкудо пакчашке ончал колта.

Ик ончалтыш гычак коеш — Овдачи чот ноен. Пареҥге сетке-влакшат ятырак койыт — ужалаш опта, витне.

Окси пелашыжлан ойла:

— Овдачилан пареҥге наҥгаяш полшо…

Окси пӧртыш пурыш. Вольыкат вӱташте, кечат шинчын, а Йыван алят уке.

…Окси огеш чыте, пошкудыжын кудывечыш пурен, пӧрт окнашке ончалеш. Ужеш: ӱстел коклаште пелашыже шинча, ончылныжо — черпыт арака, Овдачи шунен-шунен сийла.

Окси ушкалаш йӧратыше огыл гынат, чонжылан ньыге-нюго чучын колтыш. Туге гынат орен, ажен пӧртыш куржын ыш пуро. Изорва дене тольо — ик сетке тушко пуренат возо. Нойышо еҥын кушеч тынар ӱнар лектеш — ӧраш веле кодеш. Окси шкежат огеш пале: кунар сетке пареҥге пакчан эн тора лукышкыжо верланыш…

Пӧртыш Окси йӧршеш ярныше толын пурыш. Пелашыже диваныште нерым коргыктен папалта ыле. Эрдене пареҥге погаш толын лектыч. Овдачи нигуш пураш ӧрын пакчаште куржталеш. Полшышат нигӧ уке, пареҥге киен кодеш гын, куш чыкет? «Тыгежак ышташ ок кӱл ыле, — шона Окси. — Овдачиетын титакше йӧршешак уке ыльыс…»

— Кӧ тыге ыштен? — шортын-шортын ойла Овдачи Оксилан. — Можо таратен? Кузе ӱчӧ ышташ ушешыже возын?

Окси шып колыштеш, шкеже пуйто ни ужын, ни колын огыл.

— Тиде ӱчызӧ тек огеш йывырте, — пелешталеш вара Окси. — Йыван ден коктын пареҥге наҥгаяшет полшена.

Пеш вашкежак огыл гынат, содыки налаш толшо дек пареҥге сетке-влак толын возыч.

«Тыланет тыгак кӱлеш, — шке нергенже шонкала Окси. — Шыде пар дене ыштылынат. Калык вет так ок ойло: «Кынервуй тыштак, да пурлаш ок лий».

 


Сергей Карпов

http://esmetr.ru/%D0%B0%D0%B2%D1%82%D0%BE%D0%B1%D0%B8%D0%BE%D0%B3%D1%80%D0%B0%D1%84%D0%B8%D0%B9/

Вам понравиться

Комментарии:

Добавить комментарий

Ваш e-mail не будет опубликован. Обязательные поля помечены *